Walter of Châtillon

Carmen VIII



I
Fallax est et mobilis lex humanae sortis,
necdum natis etiam spondent horam mortis,
ac peccatis ulcio semper est in portis,
quia sic instituit Judex justus, fortis.

II
Si quis ergo sperneret mundum male tutum,
nummorum congeriem reputans in lutum,
conservans viriliter corpus incorruptum,
hunc plane diligeret Dominus virtutum.

III
Set non placet omnibus haec consuetudo,
quia placet amplius bursae plenitudo;
universos allicit cutis pulchritudo,
hodie vix aliquem decet sanctitudo.

IV
Ubi sunt Ecclesiam in Christo regentes,
qui velint exsistere benefacientes,
exemplorum lumine tantum relucentes,
ut laetentur pariter et exultent gentes?

V
Nil volunt palacii subditis conferre
et, cum modo conterant totum mundum guerrae,
nolunt se pro filiis Israel afferre,
ut in pace maneant omnes fines terrae.

VI
In bellorum turbine de deo diffidunt,
hos norunt metuere, qui corpus occidunt,
omnes in pecuniae thesauris confidunt,
assidos et validos debiles elidunt.

VII
A foris suscipiunt cultum pastoralem,
nunquam degustati sunt cenam spiritalem,
non habentes apud se vestem nupcialem,
agentes operibus curam mercennalem.
VIII
Isti sunt quos timidos efficit potestas
et quos nunquam afficit pauperum aegestas,
hos districti judicis opprimet majestas,
cujus in circuitu valida tempestas.

IX
Omnes avariciae coeunt caecatum,
ore psalmos ruminant, in corde mercatum;
nonne, dum non cogitant Domini mandatum,
eorum oracio fiet in peccatum?

X
Habundes in capite cano senectutis
retinent in moenibus flores juventutis;
male sibi conscii de via virtutis
insectantur alios gladios acutis.

XI
Ex iis esse novimus plures Sodomaeos
deas non recipere set amare deos,
set, quotquot invenerit hujus rei reos,
qui in coelis habitat irridebit eos.

XII
Sic pascunt, ut ipsimet pocius pascantur,
qui vix ad humilium praeces inclinantur,
attamen sublimiter eis dominantur;
confundantur pariter et revereantur.

XIII
Qui bursae solummodo quaerunt implementum
nec Christi familiis dividunt frumentum,
qui male dominicum duplicant talentum.,
veterescunt miseri sicut vestimentum!

XIV
Quis Mirreo praesuli similis nunc vivit?
Nam mna hujus quia mnas decem acquisivit,
hunc ad ea Dominus praemia ascivit,
quae non vidit oculus nec aures audivit.

XV
Paucos sibi similes nunc habet Paulinus
et quem condam habuit patrem Mons Cassinus,
set et qualis exstitit pastor Tudertinus,
vix habet consimiles Ecclesiae sinus.

XVI
Sanctulum praesbyterum nolumus tacere
qui vita pro proximo voluit carere;
set moderni praesules hoc solum legere:
"Si nichil attuleris, exibis, Homere".

XVII
Magis fiunt avidi tumore bursarum,
sitim quod multiplicat fons diviciarum,
quia sic desiderat congestus earum
ut cervus desiderat ad fontes aquarum.

XVIII
Si me forsan adiunt ab hoc Pharisaei
quod eos non taceo tantae reos rei,
cantabo suppliciter in conspectu dei:
"Ego dixi: Domine miserere mei!"

XIX
Set ausculta, Pontifex, cor habens tam caecum:
ut thesauros congreges, estimo non aequum,
quare dicit dominus, ut jam loquar tecum:
"Nonne ex denario convenisti mecum?"

XX
Audi, pastor ovium, vivere si velis,
pugnato pro Israel manibus et telis:
sis in domo Domini prudens et fidelis,
ut laudare valeas Dominum de coelis!



Medieval Latin The Latin Library The Classics Homepage